Дар толори Шӯрои олимони Донишкадаи политехникии Хуҷандии Донишгоҳи техникии Тоҷикистон ба номи академик М.С. Осимӣ ҷаласаи васеи муштараки кафедраи «Автомобилҳо ва идоракунӣ дар нақлиёт» ва кафедраи «Иқтисодиёти муҳандисӣ ва менеҷмент» баргузор гардид.

Дар ҷаласа кори диссертатсионии унвонҷӯ Тоҳирӣ Тоҳир Исломзода дар мавзуи «Низоми нақлиётӣ ҳамчун омили таъмини амнияти иқтисодии минтақа» дар мисоли вилояти Суғди Ҷумҳурии Тоҷикистон баррасӣ гардид. Кори мазкур барои дарёфти дараҷаи илмии номзади илмҳои иқтисодӣ аз рӯйи ихтисоси 5.2 - Иқтисодиёт, самти 5.2.8 - Иқтисодиёти нақлиёт пешниҳод шудааст.

Роҳбари илмии таҳқиқоти диссертатсионӣ доктори илмҳои иқтисодӣ, профессор Авезов Азизулло Ҳабибович мебошад.

Дар рафти ҷаласа иштирокчиён мубрамияти мавзуи таҳқиқот, навгонии илмӣ, аҳамияти назариявӣ ва амалии онро муҳокима намуданд.Таваҷҷуҳи махсус ба нақши низоми нақлиётӣ дар таъмини амнияти иқтисодии минтақа, баланд бардоштани самаранокии инфрасохтори нақлиётӣ, коҳиш додани арзиши аслии ҳамлу нақли автомобилӣ, беҳсозии ҷараёнҳои нақлиётӣ ва истифодаи технологияҳои инноватсионӣ дар соҳаи нақлиёт равона гардид.

Тавре дар кори диссертатсионӣ зикр шудааст, низоми нақлиётӣ яке аз омилҳои калидии рушди устувори иҷтимоию иқтисодии минтақа, таҳкими робитаҳои хоҷагидорӣ, баланд бардоштани ҷолибияти сармоягузорӣ ва истифодаи иқтидори транзитии вилояти Суғд ба ҳисоб меравад.

Аз рӯйи натиҷаҳои ҷаласаи васеъ, андешаҳои ҳайати профессорону омӯзгорон, мутахассисон ва иштирокчиёни муҳокима шунида шуданд. Кори диссертатсионӣ ҳамчун таҳқиқоте, ки барои рушди низоми нақлиётӣ ва таҳкими амнияти иқтисодии минтақа аҳамияти муҳими илмӣ ва амалӣ дорад, баҳои мусбат гирифт.

Шуъбаи итилоот ва кор бо ВАО